Acts 28
I lodo Malta
1Di madau dau aga hagahumalia gi tongotai, gimaadou ga modongoohia bolo di ingoo tenua deelaa la go Malta. 2Nia daangada o tenua deelaa nogo buni mai gi gimaadou. Digaula ga akaa di nadau ahi, ga gahi mai gimaadou huogodoo, idimaa, nogo uaua ge nogo magalillili. 3Gei Paul ga gaamai dana uu dohomu, ga wangawanga ana dohomu gi lodo di ahi, di gihaa ga ulu mai gi daha mo di uu dohomu, idimaa, mee gu welengina, ga kadi di lima o maa. 4Nia daangada o tenua deelaa gu gidee ginaadou di gihaa dela e daudau i di lima o Paul, ga helehelekai i nadau mehanga, “Taane deenei holongo tangada daaligi dangada, di ahiaalaangi hagalee dumaalia gi mee gi mouli, maeaha mee gu mee di tanga gi daha mo di haingadaa o di moana.” 5Gei Paul ga badu gi daha di gihaa deelaa gi lodo di ahi, gei mee digi longono ia dahi mmae. 6Digaula gu tali bolo mee ga haga hula be ga hinga gi lala ga made. Di nadau talitali mai gi nomuli, gei digaula digi gidee di mee ne hai gi mee, digaula gu huli nadau maanadu, ga helekai, “Mee go di god!” 7Hoohoo mai gi di gowaa iei gimaadou, nia gowaa i golo, nia gowaa ni Publius, di tagi ni tenua deelaa. Mee gu gahi mai gimaadou, gu benebene gimaadou hagahumalia i nia laangi e dolu. 8Tamana o Publius e moe i hongo di hada kii, e magi welengina ge e magi halangina. Paul ga hana gi lodo di ruum o maa, ga dalodalo, ga dugu dono lima gi hongo o mee, ga dalodalo, ga hagahili di magi o maa. 9I muli hua di mee deenei ne hai, nia daangada huogodoo ala e magi i hongo tenua deelaa, ga lloomoi gi mee, e hagahili nadau magi. 10I di madau hagatanga, digaula gu gaamai nadau kisakis, gei gu gaamai madau mee ala e hai hegau ai i hongo di waga.Mai Malta gi Rome
11I muli nia malama e dolu, gei gimaadou ga hula i di wagabaalii mai Alexandria, dono ingoo bolo “Dioscurii”. Di wagabaalii deenei nogo noho i tenua deelaa i nia malama magalillili. ▼ 12Gimaadou ga dau i lodo di waahale go Syracuse, ga noho i golo i nia laangi e dolu. 13Gei gimaadou ga hagatanga ga dau i di waahale go Rhegium. Dono daiaa, gei di madangi gu angiangi mai i ngaaga, gei muli nia laangi e lua, gei gimaadou ga dau i di waahale go Puteoli. 14Gei gimaadou gu heetugi gi digau hagadonu i golo, ala ne hai mai gi gimaadou bolo gi noho i nadau baahi i tabu e dahi, nomuli gei gimaadou ga hula gi Rome. 15Digau hagadonu ala i Rome, ne longo bolo gimaadou i golo, ga lloomoi loo haga mogowaa i di waahale go “Di Gowaa Huihui mee o Appius” mo di waahale go “Hale e Dolu”, belee heetugi mai gi gimaadou. Di madagoaa Paul ne gidee digaula, gei mee gu hai dana danggee ang gi God, gei gu damana mai dono hagadagadagagee.I Rome
16Di madau dau i Rome, digaula gu dumaalia gi Paul gi noho modogoia, e hagaloohi go tangada dauwa. 17Nia laangi e dolu nomuli, gei Paul gu haga dagabuli mai nia dagi digau o Jew. Di madagoaa ne dagabuli mai digaula gi di gowaa e dahi, gei mee ga helekai, “Ogu ihoo digau Israel! Au digi hai dahi mee e hai baahi ang gi nia daangada o tadau henua, be ang gi nia hangaahai o tadau maadua mmaadua i mua, gei au ne galabudi i Jerusalem, ga wanga gi digau o Rome. 18I muli nadau heheeu nadau mee mai gi di au, gei digau o Rome gu hai belee hagamehede au, idimaa, digaula gu modongoohia bolo au digi hai dagu mee hala, ga hidi iei au belee daaligi. 19Digau o Jew hagalee donu gi di mee deenei, gei digaula gu hono au bolo e gabunga labelaa i baahi o Caesar, gei au deai dagu mee i golo bolo au ga hai baahi ang gi digau o Jew ai. b 20Deelaa laa, au e gahi mai goodou belee heetugi gidaadou e helehelekai. Deenei laa au gu lawalawa gi taula baalanga beenei, i di gili o tangada dela e hagadagadagagee ginai digau Israel.” 21Gei digaula ga helekai gi mee, “Gimaadou digi dau di madau lede mai Judea e helekai i di goe, be deai tangada mai i gimaadou ne hanimoi i golo mo ana longo huaidu e helehelekai i di goe ai. 22Gei gimaadou e hiihai belee hagalongo mai i doo baahi mai i lodo au maanadu, idimaa, gimaadou e iloo bolo i nia madagoaa huogodoo nia daangada e leelee hai baahi ang gi di hagabuulinga dela e dau ginai goe.” 23Digaula ga dugu di nadau laangi gi Paul, gei dogologowaahee ne lloomoi i di laangi deelaa, gi di gowaa dela e noho iei Paul. Mai luada ga dae loo gi di boo, mee nogo agoago gi digaula i di hai o Tenua o God. E hagamada belee haga modongoohia gi digaula di hai o Jesus mai lodo Nnaganoho Moses mo lodo nia Beebaa o nia Soukohp. 24Hunu gau i digaula gu hagadonu ana helekai, gei hunu gau i digaula hagalee hagadonu. 25Digaula ga hagatanga hua, gei digi donu nadau mehanga, i muli hua Paul ne helekai di mee e dahi deenei, “E humalia huoloo di hai o di Hagataalunga Dabu dela ne helekai gi soukohp Isaiah, bolo gi helekai gi godou maadua mmaadua namua, 26boloo,Hana, helekai gi nia daangada aanei: Goodou ga hagalongo, ga hagalongo, ge hagalee modongoohia. Goodou ga mmada, ga mmada, gei e de gidee. c 27Idimaa, nia daangada aanei la gu haga hamaaloo nadau lodo. Digaula gu hai nadau dalinga mo nadau golomada gi pono. Maa nei bolo hagalee hai beenei, gei nadau golomada le e- gidee, nadau dalinga le e longono, nadau hagamaanadu ga donu ang gi ginaadou ga lloomoi gi di au, gei au ga hagahili ginaadou. God ne helekai beenei.”
28Gei Paul ga helekai hagalawa dana agoago, “Goodou gi iloo bolo nnelekai o di haga mouli a God la gu hagau gi digau tuadimee, gei digaula ga hagalongo!” 29[Muli hua Paul ne helekai nia mee aanei, digau o Jew ga hula, ga lagalagamaaloo i nadau mehanga.]
30Nia ngadau e lua, Paul nogo noho i lodo di hale huihui, deelaa di gowaa a mee ne hagamolooloo mai nia daangada ala bolo ginaadou e heetugi gi mee. 31Gei mee ga agoago i di hai o Tenua o God mo di agoago i di hai o Tagi go Jesus Christ, gei mee e helekai manawa maaloo, ge deai tangada e hai baahi gi mee ai.
Copyright information for
KPG